Алматы қаласындағы маңызды магистральдардың бірі – Төле би көшесінде орташа жөндеу жұмыстары жүріп жатыр. Жөндеу жұмыстары Назарбаев даңғылынан Шығыс айналма автожолына дейінгі аралықты қамтиды.
Аталған нысанда мердігер мекеме – «ПСФ АЛОНС» ЖШС. Жұмыстың сапасын Жол активтері сапасының ұлттық орталығы Алматы қалалық филиалының инженерлері бақылауда. Бұл жерде Titan маркалы полимерлі қиыршық тасты мастикалық асфальтбетон қолданылып жатыр. Өнімді «АБЗ Асфальтбетон-1» ЖШС дайындаған.
Сапа бақылау жұмыстары аясында мамандар жолға төселген асфальтбетоннан сынама алып, оны зертханалық тексеруге жіберді.
Инженер Мейіржан Мырзахметтің айтуынша:
«Жол құрылысы кезінде қолданылатын материалдардың сапасын қатаң қадағалаймыз. Асфальтбетон қоспасының үлгілері зертханада тығыздығы, түйіршік құрамының біркелкілігі, беріктігі секілді көрсеткіштер бойынша тексеріледі. Бұл – жолдың ұзақ қызмет етуін қамтамасыз ететін маңызды кезең».
Төле би көшесіндегі орташа жөндеу жұмыстары жоспарға сәйкес жалғасуда. Жол сапасы мен төсеу технологиясы толық бақылауда.
