Петропавлда ер адам үш адамды өлтіргені үшін өмір бойына бас бостандығынан айырылды, деп хабарлайды ALASH.KZ.
Сот Петропавл қаласының 25 жастағы тұрғыны Александр Канищевті әйелін, оның кішкентай қызын және өзінің туған інісін өлтіргені үшін өмір бойына бас бостандығынан айырды.
Қылмыс 2023 жылдың қыркүйек айында болған. Жекеменшік үйдегі өрттен кейін Канищев жалғыз тірі қалған адам ретінде танылды. Алайда кейін тергеу барысында анықталғандай, екі бала өрт шықпай тұрып қайтыс болған, ал 20 жастағы Алина Котяштың өліміне иісті газдан улану себеп болған.
Бұл қорытынды мәйіттерді қайта қазып, қосымша сараптама жүргізілгеннен кейін жасалды.
Қайғылы оқиғадан бір ай өткен соң Канищевке күдікті мәртебесі берілді. Прокуратура өкілдері оның кісі өлтіруді жасыру үшін әдейі өрт қойғанын мәлімдеді.
2024 жылдың шілде айында алқабилер соты оны ақтап шықты. Алайда кейін кейбір алқабилердің туыстары бұрын сотталғаны анықталып, бұл заң талаптарының бұзылуына себеп болды. Осыған байланысты іс қайта қарауға жіберілді.
Қайта өткізілген сот процестің қорытындысы айыптау үкімімен аяқталды. Алқабилер Канищевті кінәлі деп таныды. Сот оны өмір бойына бас бостандығынан айыру жазасына кесті.
Сотталған азаматтың үкімге шағым түсіруіне 15 күн уақыты бар.
